Paglala ng problema ng iligal na droga imbestigahan – Enrile
MANILA, Philippines — Matapos aminin ni Pangulong Duterte na hindi pa rin tapos ang problema ng iligal na droga at mas lalo pa itong lumala, iginiit ni dating senator Juan Ponce Enrile na marapat lamang na magkaroon ng imbestigasyon tungkol dito.
Ayon kay Enrile, dapat ding mas palakasin ang puwersa ng kapulisan at militar dahil marami pang nakakapasok na droga sa teritoryo ng Pilipinas.
Idinagdag ni Enrile na kailangan na bigyan ng mas malaking budget ang Philippine National Police at ang militar para magkaroon ng mas maraming patrol boats at mga modernong kagamitan na magagamit sa pangangalap ng impormasyon.
Patunay aniya na hindi nahihinto ang pagpasok ng iligal na droga ang mga malalaking shipment ng shabu na nasasabat ng Philippine Drug Enforcement Agency (PDEA).
Pero idinagdag ni Enrile na hindi sapat na nahuhuli ang shipment ng shabu dahil mahalaga rin na mapanagot ang mga taong nasa likod nito.
Mas magiging epektibo aniya ang kampanya laban sa iligal na droga kung may nasasampolan at may napapanagot sa batas.
- Latest