Pagbabawal sa ‘driver-only’ sa EDSA binira
MANILA, Philippines — Kinondena ni Buhay Rep. Lito Atienza ang plano ng Metropolitan Manila Development Authority (MMDA) na nagbabawal sa pagdaan ng driver-only na mga sasakyan sa EDSA tuwing rush hour.
Sinabi ni Atienza, sa halip na alisan ng MMDA ng karapatan ang mga mamamayan na dumaan sa EDSA, ang dapat gawin ng mga ito ay magtrabaho.
Mali anya ang MMDA na sisihin na naman ang publiko sa mga problema na hindi nila inaasikaso kaya hindi dapat matuloy ang planong nagbabawal sa isang pasahero lamang bawat sasakyan na dadaan sa EDSA sapagkat maituturing itong parusa sa taumbayan.
Paliwanag pa ni Atienza, binigyan na nga ang publiko ng number coding at ngayon naman ay planong alisan ng karapatan na makagamit ng sasakyan sa EDSA.
Ang kawawa sa hakbang ng MMDA ay yung mga may-ari ng sasakyan na wala namang kakayahan na kumuha ng driver o kaya naman ay iisa lamang ang driver sa pamilya subalit may higit sa dalawang sasakyan.
Sa paabiso ng MMDA na dumaan na lamang sa mga side street, paliwanag ng mambabatas, hindi rin naman ito madaraanan dahil sa maraming sagabal na hindi naman inaaksyunan ng ahensya.
- Latest