MANILA, Philippines – Isang manifesto ng pagsuporta sa pagkandidato ni Defense Secretary Gilbert Teodoro sa halalang pampanguluhan ang inihayag ng Unified Patriotic Transport Organization of the Philippines nang maging panauhin siyang pandangal sa asamblea ng UPTO sa Quezon City kamakailan.
Sinabi sa manifesto na, sa lahat ng mga presidentiable, si Teodoro lamang ang may kuwalipikasyon, pag-uugali at kakayahan upang maging mabuting pangulo ng bansa.
Sinabi naman ng kalihim sa kanyang talumpati na kasama sa mga problemang kanyang pinag-aaralang matugunan ang hinggil sa transport sector.
Sa kaugnay na ulat, inilunsad kahapon ng mga staff at supporter ni Teodoro ang cyber space campaign para sa kanyang kandidatura.
Sinabi ng isa sa mga bumuo sa website na si JC Perlas na, tulad ng tagumpay ni Barack Obama sa eleksyon sa Estados Unidos noong nakaraang taon, umaasa silang mangyayari rin ito kay Teodoro sa pama magitan ng internet. (Butch Quejada at Joy Cantos)