Hinikayat kahapon ni Sen. Richard Gordon ang mga mamamayan sa Autonomous Region of Muslim Mindanao (ARMM) na bumoto bukas at ipakitang sinusuportahan nila ang demokrasya sa bansa.
Ayon kay Sen. Richard Gordon, hindi dapat matakot ang mga mamamayan sa ARMM at dapat ipakita ng mga ito na kayang maging automated ang elek siyon sa bansa.
Ikinatuwa ni Gordon na ang mga Muslim ang unang makakaranas ng automated elections na siguradong magagamit na rin sa presidential elections sa 2010.
Hindi aniya dapat ituring na problema ang pagsusulong ng automated elections dahil sa ibang bansa ay ginagamit na rin ito kabilang na sa Iraq na nagka-roon ng giyera.
Naipakita aniya ng Iraq noong 2005 na nais din ng mga Iraqis na magkaroon ng demokrasya sa kanilang bansa.
Kung nakaya umano ng Iraq na magdaos ng eleksiyon sa oras ng giyera, hindi imposibleng magawa rin ito sa ARMM dahil hindi sa buong Mindanao may gulo.
Si Gordon ang awtor ng RA 9369 o ang amended Automated Elections Law, na magbibigay daan upang maging computerized na ang eleksiyon sa bansa.
Samantala, tiniyak kahapon ng Comelec na maayos na nakaselyo ang lahat ng electronic voting at counting machines na gagamitin bukas sa halalan sa ARMM. (Malou Escudero/Ludy Bermudo)