Ito ang nilalaman ng pangatlong "motion for reconsideration" ni dating Malabon Regional Trial Court branch 73 Judge Florentino Floro Jr. na inihain nito na naglalayong makabalik siya sa nasabing posisyon.
Sa nabanggit na mosyon ni Floro, magdaranas ng sumpa ang mga mahistrado ng Korte Suprema gayundin ang kanilang mga kamag-anak hanggang sa ika-apat na saling lahi.
Ito anya ang napagkasunduan ng tatlong duwende na sina Armand, Luis at Angel na nagpakita sa kanya noong nakaraang linggo matapos na tila mag-"en banc session" ang mga ito.
Inilakip ni Floro sa kanyang mosyon ang mga larawan ng tatlong duwende na tila kamukha ng komedyanteng "three stooges."
Nagalit umano ang mga nasabing duwende sa hudikatura dahil sa pagtatakip ng mga ito sa katotohanan partikular na sa kanyang kaso.
Magsisimula umanong matupad ang sumpa sa hatinggabi ng Nobyembre 5 kasabay ng ika-53 kaarawan ni Floro.
Isa lamang umano sa mga mahistrado ang makakaligtas sa nabanggit na sumpa matapos na pakiusapan ni Floro ang tatlong duwende na huwag itong idamay.
Hindi naman tinukoy ni Floro kung sino sa 15 mahistrado ang hiniling niyang huwag mapasama sa sumpa ng kanyang mga kaibigang duwende.
Magugunita na sinibak ng SC si Floro dahil sa umano’y weird na pagsasagawa nito ng hearing sa kanyang sala at pagkonsulta sa mga nasabing duwende sa pagpapalabas ng desisyon.