Ayon kay Press Secretary Ignacio Bunye, may ipinatutupad na principled reconciliation si Pangulong Arroyo, subalit lumabo na ito dahil ang pinakahuling rally ay nagpakita na iisa lang ang layunin ng militante, ang maibagsak ang gobyerno ni Arroyo.
Sinabi ni Bunye na ang grupo ng ralista sa unang hanay ay nagpakita ng determinasyon na makapasok sa Mendiola kaya sumiklab ang gulo. Nakita rin sa footage ng video ang pambabato at pananadyak ng ralista sa mga pulis at paghatak sa isang babaeng pulis kaya maraming nasaktan.
Idinepensa rin ni Bunye ang pagbibigay ng Pangulo ng medalya sa mga nasugatang pulis dahil ginampanan lamang ng mga ito ang kanilang tungkulin sa kabila ng pang-aabuso at pang-iinsulto sa kanila ng mga demonstrador. (Lilia Tolentino)