Dear Tito Miguel,
Maayong adlaw! Ako si Christian, 26 years old ug manager sa usa ka pharmacy. Happy ra ko sa akong love life karon. Ka-Facebook ra gihapon mi sa akong ex, pero wala ko kasabot kay kun makakita ko nga happy akong ex, saputon man ko uy. Unsa akong buhaton para mawala akong kinaiya nga ingon niana?— Christian
Christian,
Dili kinahanglan wagtangon, kay lagmit dili gyud na nimo kinaiya, kun dili reaction lamang sa mga post sa imong ex. Kay apektado man ka, buot pasabot wala pa ka maka-move-on sa inyong kagahapon. Kay kun hingpit na ka nga nakalimot niya, wala nay epekto kanimo maski unsa pa iyang gipatik. Gani, di ka kasiguro kun tiunay ba gyud siya nga malipayon sama sa iyang gipakita sa social media. Kasagaran baya dili mo post sa ilang kapakyas ug kasubo, gawas tingali kun mopahibawo dunay nitaliwan sa pamilya. Di ba kaha iya lang ni gituyo aron pasuyaon ka? Kun mao, nagmalamposon siya, alkanse ka. Ang social media pugad sa nagpaka-aron ingnon ug nagmamarunong, busa angay ka motutok sa imong kaugalingon sa hilom.
Ang angay nimo buhaton kay ang likayan siya, i-unfollow karon dayon. Naa na man kaha kay bag-ong uyab, hatagi siya’g respeto pinaagi sa pagputol sa tanan nimong koneksyon sa imong uyab kaniadto, labi na’g apektado pa ka sa unsay panghitabo niya. Kun way makita imong mga mata ug way mabati imong dunggan, wa say bation imong dughan. Itutok imong atensiyon sa imong uyab karon, kay kun sige ka’g lingi sa imong kagahapon, madam-ag gyud ka maski asa ka padulong. Undangi na’g kaon sa ampalaya, tagamtama ang katam-is sa hinog nga mangga, kay kun imo nang pasagdan, madunot na kadugayan. —Tito Miguel
Magpatambag ka? Ipada kang Tito Miguel: 0998-581-5856