Virtual Cebu Pop unya!

CEBU, Philippines — Unyang alas kwatro (4pm, January 15), na sa hapon, mahitabo ang 41st Cebu Popular Music Festival.

Apan sukwahi sa nanlabay nga gabii sa panagsangka, walay live audience ang edisyon karong tuiga gumikan usab sa pandemya.

Ang mahitabo mao nga isalida live sa Cebu Popular Music Festival Facebook ug Youtube channel ang panagtigi sa 12 ka mga awit nga naglangkob sa indigay karong tuiga nga gibahin ngadto sa tulo ka mga kategorya.

Madungog sab kini pinaagi sa Dyrf Radyo Fuerza 1215khz.

Nasayran nga dili na lang unta magpahigayon og panagsangka karong tuiga, apan wala nitugot ang amahan sa Cebu Pop nga si First District Representative Eduardo Gullas niini, sanglit buot niya nga ipadayon gyud ang iyang tinuod nga halad ngadto kang Señor Sto. Niño, isip pasalamat usab ug pag-abag sa pagpalambo sa Sugbuanong musika.

Kathniel, dili pabor og live-in!

Dili pabor si Daniel Padilla sa live-in set up. Kini maoy nasayran dihang gipangayuan siya og panahom kabahin niini atol sa finale presscon para sa ilang digi movie nga The House Arrest of Us niadtong Miyerkules.

"Whoa! Hahaha! Hindi pa siguro. Hindi pa kami handa magsama sa isang bahay," nagkanayon si Daniel.

Pagpasabot niya, daghang mga bata nga nagtamod ug nag-isip nila nga role models, sama na lang sa manghod sa iyang hinigugma nga si Kathryn Bernardo. "Papakasal muna kami saka kami magsasama sa isang bahay. "Dahil si Kathryn nandun pa yung [kapatid niya na] si Lexine, di ba? Bata pa si Lexine. Siya ang ate nun. Binabantayan niya yun.

"Ako naman, nandiyan pa yung mga kapatid kong babae. Binabantayan ko pa rin. "Marami pa kaming bantayang magaganap. Papakasal muna kami."

Kylie, vlogger na!

Gilusad ni Kylie Versoza ang iyang youtube channel pinaagi sa pag-upload og teaser video niadtong Miyerkules.  Ug nakakuha dayon siya og kapin sa tres mil ka subscribers. Si Kylie ang ika-unom nga Pinay nga nakoranahan isip Miss International niadtong 2016. Nisulod siya sa showbiz isip Viva Artist talent ug gipaila pinaagi sa Los Bastardos diin nakaila niya ang iyang hinigugma karon nga si Jake Cuenca.

Lahi na’g direktor

Dili na si Jerrold Tarug maoy director sa umaabot nga Darna teleserye sa Kapamilya Network nga pagabituonan ni Jane de Leon. Sa usa ka tweet kagahapon, gitubag ni Tarug ang pangutanan kabahin niini. Suma pa niya adunay “conflict of schedule” busa dili na siya makahigayon alang sa maong serye. Niingon hinuon siya nga bukas siya sa kun unsa may mamahimo niyang matabang sa maong serye sa umaabot.

Gikapoy sa intriga

Naglibog pa si Derek Ramsay kun mubalik na ba siya og trabaho gumikan sa daghang mga intriga nga gibato ngadto niya. Suma pa niya, gikapoy na siya og panagang niining mga walay basehanan nga tsika. Ang taho mao nga dili na gyud mahinayon ang teleserye unta nila ni Andrea Torres gumikan sa ilang panagbulag niadtong Nobiyembre. Gani si Andrea, kasamtangan na nga nagtaping alang sa Legal Wives kauban sila si Alice Dixon, Bianca Umali ug Dennis Trillo. Ang tsika mao nga sa March gitakda nga sugdan nan i Derek ang iyang bag-ong project sa GMA7.

Bulahan ka, Ejay!

Human nilugwa sa TV5 pinaagi sa blocktime series nga Paano Na Ang Pasko?, balik ABS-CBN si Ejay Falcon ugma pinaagi sa MMK episode diin kapares niya si Arci Munoz. Mao ni ang labing unang higayon nga subling makita si Ejay sa mga kapamilya fans sukad nga gibasura sa kongreso ang franchise renewal sa estasyon. Padayon pa sab gihapon nga makita si Ejay sa TV5 sanglit adunay book ang maong Christmas serye nga karon giulohan na og Paano Na Ang Pangako? Blocktimer show kini sanglit ginama man sa Cignal Entertainment ug Idea First Company.

Nagtakong paggukod sa iro

Kataw-anan ang tweet ni Heart Evangelista apan sa samang higayon makapabalaka. Kini kay saysay pa niya, hapit siya nilusot sa ilawom sa usa ka truck dihang gigukod niya ang iyang iro nga nakabuhi. Nagtakong pa gyud siya ug kulot ang buhok samtang gipahunong ang mga sakyanan sa tunga sa dalan aron dili maligsan ang iyang iro. Nagpasalamat siya sa usa ka car driver nga niabli sa sakyanan niini aron mababagan ang iro ug dili na makadagan pa. Nagpasalamat sab siya sa mga guard, sa iyang hairstylist ug sa iyang ate nga nagtakong sab nga nitabang paggukod sa iro. Ang iyang gikahadlokan nga kasab-an siya sa iyang bana nga si Sorsogon governor Chiz Escudero kay diriyot siya nadisgrasya.

Natulala pa

Wala pay detalye si Ara Mina kanus-a ang ilang kasal ni Undersecretary Dave Almarinez. Giangkon niya atol sa presscon sa umaabot nila nga movie nga Paglaki Ko Gusto Ko Maging Pornstar nga natulala pa siya sa engagement niya adtong Martes. Gaingkon hinuon niya nga answered prayer niya si Dave, kinsa duha ka tuig niyang ka relasyon sa wala pa ang maong engagement.