Yes, keep calm. Don’t panic. Nahugyaw ko sa akong nakita last Friday and yesterday uy kay naglinya man gyud gihapon ang mga tawo sa nagkadaiyang botika dinhi sa dakbayan aron lagi makapalit og face mask. Ambot lang uy nganong natarantar sila’g maayo. Ang face mask is dili gyud na siya maoy labing lig-on nga panagang batok sa Novel Corona Virus. Makatabang lang. Apan dili tanan kinahanglan mag-face mask uy, utang buot.
Busa, akong imantala diri ang post ni Kapusong Alan Domingo nga kolumnista sab nato diri sa Banat News. Mao ni ang katin-awan sa Department of Health kabahin sa paggamit og face mask:
*Ang mosol-ob og face mask kadto lang mga tawo nga aduna nay gipamati sa lawas nga dili gustong makatakod sa uban...
*Kadto usab mga tawo nga huyang ang resistensya sama sa mga tiguwang, dunay hb, diabetes ug uban pa....
*Ang Novel Coronavirus self- limiting, nagpasabot nga mahimong mawagtang ra human sa pipila ka adlaw...
*Kanunay manglimpyo sa lawas ug sa palibot aron dili kaatraka ang virus....
There you go! Kun wala moy gipamati ug lig-on inyong resistensya, ipalabi lang usa nang face mask sa mga masakiton. Gawas pa ang atong mga medical personnel nga labaw’ng nagkinahanglan niini—ilabi na surgical mask—ayaw na lang ninyo’g kumpetensiyahi.
Ang tambag sa mga eksperto mao nga kanunayon ang pagpanghunaw sa mga kamot, ug kinahanglan nga sabunan gyud.
Kun mo-ubo ka, kinahanglan manap-ong ka sa imong baba, o dili ba kun muhatsi imong sap-ongan imong baba. Paningkamoti usab nga makapahulay ka og tarong pinaagi sa pagbaton og taas o kompleto nga pagkatulog sa gabii.
Inom og Vitamin C—pwede mokaon og prutas nga tugob niini sama sa oranges, bayabas ug uban pa. Inom og tubig kanunay— ayaw paughi imong tunlan.
Mao na diha, dear okRYANians! Kalma lang gyud ta kay basin sa atong kabalaka, kita na hinuon ang maalaut. Labaw sa tanan, mag-ampo. Musalig kita sa Labaw’ng Makagagahum nga dili ta niya pasagdan. Have a blessed Sunday!