Performance ni Arjo gidayeg
CEBU, Philippines — Nakadawat og mga pagdayeg gikan sa Autism Society of the Philippines ang pagdala sa aktor nga si Arjo Atayde isip special child sa telseryeng The General’s Daughter .
“Arjo’s portrayal of autism is sensitive and nuanced. The character is well developed and avoided stereotypical caricatures. Bravo!” tweet pa sa .Autism Society of the Philippines.
Kahinumdoman nga nanamilit na ang karakter ni Arjo sa maong teleserye.
Nabun-og sa trabaho
Nagpusot-pusot ang trabaho ni Maine Mendoza karong panahona ilabi na nga duha ka mga pelikula ang kasamtangan niya nga gi-shoot .
Gamay ra ang pahulay ni Maine gumikan kay busy siya sa shooting sa pelikula nila ni Carlo Aquino nga Iisa Pa With Feelings.
Duna pud sila’y pelikula ni Vic Sotto nga Mission Unstapabol nga gisugdan napud ang shooting sa miaging adlaw. Gawas sa mga pelikula, duna pa siya’y noontime show nga Eat Bulaga.
Cebuana naka-duet ni JMC sa Japan
Usa ka Cebuana ang naka-duet ni Jose Mari Chan sa iyang concert nga “A Love To Last A Lifetime” didto sa Japan sa miaging gabii.
Nahugyaw ang Filipino Community didto sa Japan human giawit ni Jose ang sikat niya nga kanta nga Please Be Careful With My Heart ug ka-duet niya ang Sugbuanon nga si Reycel Punay.
Ang maong concert gipahigayon sa Tower Hall Funabori ug gipaluyohan kini sa Gathering of Filipino Groups and Communities (GFGC).
Kasamtangang nagtrabaho si Reycel sa maong dapit ug wala niya damha nga usa siya sa mapilian aron makauban ni Jose sa entablado.
Nasayran nga sa wala pa nagbase si Reycel sa Japan, usa siya ka event singer dinhi sa Sugbo ug kabahin sa grupong House of Ella.
Si Reycel pud ang nagkanta sa Sa Imong Kalooy Oh Sto.Niño nga nagmadaogon sa Huniño: Huni Halad Alang Kang Señor Santo Niño niadtong 2016.
- Latest