Beautiful Friday

Kanunay'ng mopatigbabaw ang pangalang Paul Flores sa mga transgender sa kasamtangang panahon kon ang make-up na maoy hisgutan sanglit usa siya sa mga inilog nga tigpaanyag kanila sa panahong mokombati  na sila og beauty pageants.

Kasagaran sa aduna nay mga pangalan nga mga transgender beauty queen dinhi sa Sugbo, kang Paul gyud magpaanyag tungod kay matud pa nila, makapagawas gyud og linahi nga kagwapa si Paul.

Walo ka tuig nga nagsilbing makeup artist si Paul sa usa ka dakong kompanya dinhi sa Sugbo diin siya ang nagsilbing official make-up artist sa performers niini.

Paglabay sa panahon, mas gipili niyang mobarug sa kaugalingun niyang mga tiil ug tuod man, upat ka tuig na ang nilabay nisugod siya isip feelance make-up artist.

Sagol nga kakuyaw ug kabalaka ang iyang gibati niadtong tungora sanglit gihunahuna man niya kon mulungtad ba siya sa maong industriya nga mag- inusara.

Apan binuligan sa dako niyang pagsalig sa Kahitas-an, matam -is dayun nga mga kasinatian ang iyang natagamtaman sukad sa iyang pag-solo ug pagpanimpad.

Dili gayud siya mawagtang sa eksena sa mga prestihiyosong indigay sa kaanyag dinhi sa Sugbo tungod kay kanunay man siyang adunay mga manok o kandidata dinhi labi na gayud sa mga kompetisyon sa mga transgender.

Lutaw sab kaayo karon ang iyang pangalan sa mga nagkadaiyang events dinhi sa Sugbo sama sa wedding, debut ug mga pre-nup pictorials.

Pagbalik lantaw ni Paul, mas nabaid gyud siya isip makeup artist niadtong siya na ang mo -handle og mo make-up sa mga kandidata sa mga beauty pageant.

Dili na sab maihap nga models ug mangapilay  og indigay  ang iyang napaanyag .

“Gusto ko’ng mahinumduman ko nila isip makeup artist nga makahatag og kalipay ug satisfaction sa akong mga clients. Ig -upload nako sa Facebook sa akong mga finish products, ang #getPAULish gyud ang akong gamitun nga hashtag kay PAULish sounds like polish it means pa nindoton ug palimpyohon nako ang make up. Mao nang naila sad ko ana nga name,” saysay pa ni Paul.

Dugang niya, usa si Jonas Borces ang iyang gi idolo ug gitamod sa makeup industry.

Sama kaniya, gusto sab niyang molungtad og dugay sa kalibutan nga iyang gisudlan.

Apan sa taud taud na niyang pagpanimpad sa Sugbo isip makeup artist, giangkon ni Paul nga sa nakalabay'ng duha ka tuig pa lamang niya hingpit nga nasinati ang iyang break human sa nagpungasi niyang mga schedule sa wedding events, prestigious pageants ug debut.

Hagbay na gyud nga  pangandoy ni Paul nga maka makeup og mga nagkadaiyang personalidad sa Sugbo ug malipayun siya sa oportunidad nga gitugyan ug sa  hingpit na niyang pagkab-ot sa dugay na niyang gitinguha.

Best award kon maisip ni Paul ang mga panahong makadawat siya og mga positibong feedback ug referrals gikan sa mga tawong nahimo na niyang kliyente.

Kini matud pa ang mga butang nga makapalipay niya isip usa ka makeup artist.

“Salamat kaayo sa tanang client nga nisalig nako isip makeup artist ug hinaot ko nga magpadayon unta gihapon ang inyong pagsalig nako. Salamat kaayo Ginoo nga anaa ka permi sa akong likod,” dugang pa niya.

Q and A

BNH: Unsa’y imong mahatag nga tips arun dili kaayo baga o dili kaayo sobra ang make up sa nawong sa usa ka babaye?

Paul: Dapat mo match ang foundation sa ilang skintone. Not too much foundation for a fresher look para dili mahimong Ms. itupya (gay lenggua sa puti kaayong nawong). One layer of foundation and a little bit of concealer. If daytime, less foundation and a little color on your face. If night time, you can put more color on your face but depende sa ma bagay sa nawong. And lastly, a very good and healthy skin gyud sa mga girls.

BNH: Unsay mas maayong buhatun sa mga girls aron mulungtad gyud ang foundation sa nawong ug no need na mag sige og retouch?

Paul: Importante ang pag-atiman sa atong skin para monindot ang foundation inig apply sa nawong. Kung nindot ug healthy atong skin, no need to retouch sige. So girls don’t forget to moisturize and hydrate your skin.

BNH: Alang kanimo, unsay nindot nga color sa lipstick ang angayang gamitun sa mga babaye nga everyday on the go?

Paul: You will never go wrong with Red Lipstick.