CEBU, Philippines - Tsika pa ni Luis Manzano nga naghisgot na silang duha ni Jessy Mendiola og kaminyoon. Gisaysay niya nga adunay panahon nga seryoso nila nga istoryaan ang kabahin niini . Matud pa nila nga daghan na sila og konsiderasyon nga gibuhat aron mas hapsay ang dagan sa ilang relasyon ug sa ilang desisyon. Dugang pa ni Luis nga ilaha ra nga inanunsyo puhon kung final na ang ilang hukom.
Dili na modayon
Gibutyag ni Ria Atayde nga dili na siya moapil sa Miss World Philippines gumikan kay gusto niya nga mo-focus sa iyang showbiz career. Matud pa niya nga naa na sa plano ang pagsalmot niya sa maong indigay apan nagkuwang na siya sa preparasyon ug oras. Dugang pa niya nga dili niya gusto dunganon ang duha sanglit nagpundok ang iyang mga proyekto karong panahona.
Lain uy
Gitataw ni Daniel Padilla nga dili siya ang mahimong leading man ni Liza Soberano sa pelikula nga Darna. “Wala namang nabanggit na ganon sa akin. Ano lang 'yun, ilusyon ng ibang tao. Ako don parang malabo naman na makita niyo ako bigla tsaka may La Luna Sangre ako, malabo yun”, suma pa ni Daniel.
Magpabilin sa TV5
Gikan mismo sa baba ni Derek Ramsey nga magpabilin gyud siya sa TV5 ug Abril 2018 pa mo-expire ang kontrata niya sa maong network. Lima ka tuig na si Derek sa TV5 ug dako ang iyang pagtuo nga ampingan sa maong network ang iyang career. “If they feel they still need me, they’ll have me”, suma pa ni Derek.
Concert sa Sexbomb
Giangkon ni Rochelle Pangilinan nga hagbay ra nila nga giplanohan sa iyang mga ka-grupo sa Sexbomb Girls nga mopahigayon og concert. Matud pa niya nga wala pa gyud kini maatiman tungod sa ka-busy sa ilang tagsa-tagsa ka personal nga kinabuhi. Dugang pa niya nga kung siya ang masunod, dayunon gyud kini niya karong Disyembre o sa sunod tuig na.
Padayunon ang career
Gusto nga mobalik sa showbiz ang Overall Junior Grand Champion Performer sa 2017 World Championship of the Performing Arts nga si Nhickzy Calma. Matud pa niya nga gusto niya ipadayon ang iyang pag-artista hangtod sa maedaran na siya. Gusto usab niya nga mapadayon ang iyang nasugdan nga karera ug makatarbaho ang iyang mga giidolo sa industriya ilabi na sila si Liza Soberano ug Enrique Gil.
Karel napunitan
Gikaguol og maayo karon ni Karel Marquez ang pagkapunit (nakuhaan) sa iyang gisabak nga sulod pa lang sa unom ka semana. Mao na unta kini ang ikatulo niya nga anak ug unang anak nila sa iyang bana nga si Sean Fariñas.
Late-bloomer
Gibutyag ni Sarah Geronimo nga dili pa gyud siya andam nga moatubang sa altar sa kaminyoon bisan pa og upat na sila ka tuig nga manag-uyab ni Mateo Guidicelli. Gipadayag niya nga dili usab niya gusto nga pugson ang iyang kaugalingon sa maong butang ilabi na nga late-bloomer gyud siya nga pagkatawo . "I don't want to be selfish sa partner ko. Kasi hindi ba, para mahanap mo ang 'Mr. Right' mo, kailangan maging 'Ms. Right' ka muna?" pasabot pa niya.
Nagpakasal na?
Miulbo karon ang hungihong nga matud pa nga nagpakasal na ang kanhi Dabarkad nga si Julia Clarete human nga mi-post kini sa miaging adlaw og gamay’ng parte sa bridal gown. Aduna pu’y espekulasyon nga naminyo na si Julia tungod kay naghisgot kini sa iyang Instagram niadtong Abril 24 nga adunay nagmugna og usa ka gown alang kaniya alang sa usa ka labing espesyal nga okasyon.
Mag-workout gyud
Isingit gyud sa Kapuso star nga si Janine Gutierrez ang pag-workout bisan pa og busy siya sa iyang showbiz commitments. Matud pa ni Janine nga kung mabakante na ang iyang oras sa trabaho, modalikyat gyud siya og workout aron mamintinar ang iyang ka-slim..
(BANAT NEWS)