CEBU, Philippines - Adunay hungihong nga nagbalik sila si Denise Laurel ug ang PBA player nga si Sol Mercado. Base sa Instagram post ni Denise, mapasalamaton kini nga nag-uban silang tulo sa iyang anak. Aduna kini taas nga kapsyon pakapin ang tam-is nga tawganay nga “my love”. Kahinumduman nga nagbuwag ang duha niadtong Oktubre sa miaging tuig.
Nakugang sa balita
Nakugang na lang ang Kapuso aktres nga si Gabbi Garcia sa dihang niulbo ang taho nga uyab na silang duha sa Kapamilya singer nga si Khalil Ramos. Matud pa niya nga kalit na lang siya nakadungog sa iyang mga kauban mahitungod sa maong balita. Depensa pa ni Gabbi nga managhigala ra sila ni Khalil busa dili angayan hatagan og malisya kun masigpatan sila nga magkuyog.
Nag-wheelchair
Padayon gihapon ang taping sa Magandang Buhay bisan og nag-wheelchair na si Karla Estrada human maaksidente ang iyang tuhod human siya gipakuratan sa iyang pag-umangkon. “Naku si Jordan, ginulat ako, tinusok ako nitong pamaypay. Nagulat ako, napalingon ako sa kanya , nag-twist na naman 'yung right knee ko, dahil di ba nasira na to," detalye pa ni Karla.
Wala’y kalibutan
Wala gihapoy kalibutan si Ian Veneracion nga daghan gihapon ang modayeg kaniya. Matud pa ni Ian nga wala siya’y nadunggan mahitungod sa mga pagdayeg sa mga tawo gumikan kay dili siya aktibo sa social media ug wala pa’y usa sa iyang mga kaila ang nakaingon niini ngadto kaniya.
Nakat-on na
Nakat-on na gyud si Jaya nga dili na kaayo mopalabi og pagsalig ngadto sa mga tawo nga nakapalibot niya. Matud pa niya nga tungod kini sa iyang driver kaniadto ug natagam na siya sa maong panghitabo. Nagdumili og detalye ang singer apan gitug-an niya nga aduna kini kalabutan sa pinansiyal nga aspeto.
Sold-out
Mapasalamaton ang Kapuso aktres nga si Marian Rivera gumikan kay sold-out sa miaging adlaw ang iyang mga flower arrangement sa iyang flower shop nga Flora Vida didto sa Florida. Wala damha ni Marian nga daghan ang nagka-interes sa iyang personal nga gi-arrange.
Nahimuot sa anak
Gikilig ang magtiayong Iya Villania ug Drew Arellano sa dihang nakita na nila ang commercial sa ilang anak nga si Primo sa usa ka produkto sa baby bath. Matud pa nila nga kanunay nila nga balik-balikon ang maong video gumikan kay malingaw sila og tan-aw sa ilang anak.
Maayo nga stepdad
Suportado ni Sancho delas Alas ang pagpakasal sa iyang inahan nga si Ai Ai delas Alas ngadto kang Gerald Sibayan. Matud pa niya nga nakita niya nga maayo nga “stepdad” si Gerald ngadto kaniya ug sa iyang mga igsuon. Kompotable ra usab si Sancho sa relasyon sa duha kay nakita niya kung unsa ka malipayon ang iyang inahan sa kiliran ni Gerald.
Nagpa-opaw
Nakahukom ang kanhi Kapamilya game show host nga si Jaymee Joaquin nga magpaupaw human niya nahibaw-an nga aduna siya’y breast cancer. Matud pa niya nga nasuta niya kini niadtong Oktubre sa 2016 ug nitungtong na kini sa stage 2. Gisugdan niya ang iyang chemotherapy niadtong Enero lang karong tuiga sa UC San Diego Moores Cancer Center. (BANAT NEWS)