Araneta napakyas sa iyang misyon
CEBU, Philippines — Si Christian "The Bomb" Araneta sa Omega Boxing Gym sa Sugbo napakyas sa una niyang pagsuway nga mamahimong world champion.
Ang garbo sa dakbayan sa Mandaue nakatilaw og mapait nga kapildihan pinaagi ni sa split decision batok ni Thai Thanongsak Simsri sa ilang IBF light flyweight title fight niadtong Huybes, Hunyo 19, didto sa Ota-City General Gymnasium sa Tokyo, Japan.
Gipalukapa ni Araneta si Simsri gamit ang makusog nga counter left hook sa ikatulong hugna.
Apan dili kini igo alang ni Araneta aron makuha ang gihandum niyang kadaogan.
Samtang si Leszek Jankowiak sa Poland mi-iskor og 114-113 alang ni Araneta, ang mga Hapon nga judges nga sila si Masakazu Murase ug Koji Tanaka mitali og 115-112 ug 116-111 pabor ni Simsri hinungdan sa split decision.
Si Simsri nagkupot na karon og 39-1 rekord nga gidayan-dayanan og 34 knockouts samtang si Araneta natagak sa 25-3 uban ang 20KOs.
Ang kampo ni Araneta mapaubsanon taliwala sa kapakyasan.
"Walay mahay kay gibuhat man namo ang tanan," matud pa ni Omega Gym head trainer Julius Erving Junco. "Ana gyud na ang boxing, dili nimo matagna. Dili pa seguro para iya."
- Latest
