CEBU, Philippines — Si Giannis Antetokounmpo nakahiagum og makapabalaka nga injury sa iyang bagtak sa dihang gibihag sa Milwaukee Bucks ang Boston Celtics, 104-91, sa sangka tali sa duha ka mga higante sa NBA Eastern Conference kagahapon didto sa Fiserv Forum sa Milwaukee, Wisconsin.
Ang kanhi MVP nga si Antetokounmpo kalit nga miluko sa korte bisan og way kontak nga nahitabo sa ikatulong kuwarter human gi-inbound ang bola ngadto sa teammate niyang si Damian Lillard.
Si Antetokounmpo, nga nakapalta og pipila ka duwa sa miaging bulan tungod sa Achilles injury, nagtakiang ug klarong nagping-it sa kasakit samtang gi-agak sa iyang mga kauban pagawas sa korte padung sa ilang locker room. Ang Bucks nagkanayon nga si Antetokounmpo ipaubos sa MRI scan aron madetermina kon unsa kaseryoso ang iyang angol.
Ang Greek superstar mitali og 15 puntos, walo ka rebounds, ug pito ka assists sa wala pa mobiya sa duwa ug wala na makabalik pa.
Sa laing duwa, nagpadayon ang mainit nga ratsada sa Philadelphia 76ers sukad sa pagbalik ni Joel Embiid human ilang gilampornas ang Detroits Pistons, 120-102, alang sa ikaunom nilang sagunson nga daog. Ang reigning MVP nga si Embiid miharos og 37 puntos, 11 ka rebounds, ug walo ka assists alang sa Sixers, nga nagkupot na karon og 45-35 rekord. Usa lamang ka duwa ang ilang gintang sa Indiana Pacers (46-34) alang sa ikaunom ug awtomatik nga luna sa East playoffs.
Didto sa Charlotte, si Luka Doncic mikadlit og 39 puntos sa iyang triple-double sa dihang gipahagsa sa Dallas Mavericks ang Hornets, 130-104.
Si Daniel Gafford mitali og 26 puntos, samtang si Kyrie Irving midugang og 18 puntos alang sa Mavericks, nga nagpabilin sa ikalimang puwesto sa West bitbit ng 49-30 nga baraha.