CEBU, Philippines — Nagmangtas sila si Dan Cardenas ug VM Cempron sa third period aron tabangan ang Goutsource Solution International (GSI) pagkulit og daog batok Donling Aircon and Refrigeration Services, 63-58 sa Donling Cup 2024 niadtong Domingo sa Ateneo de Cebu old campus sa Mango Avenue, Cebu City.
Ang best player nga si Cardenas mipupo'g 28 puntos uban ang lima ka rebounds ug pito ka assists aron mangulo sa opensa sa GSI. samtang si Cempron dunay 21 puntos.
Biya ang GSI ni team manager Ivan Llesol sa third period, apan sila si Cardenas ug Cempron mipauwan og tres sa maong kuwartet aron hatagan ang GSI og 41-35 nga bentaha ug gikan niadto kontrolado na nila ang duwa.
Bugtong si Jessie Sanchez lang ang miiskor og double figures sa team ni Don Quilaton pinaagi sa iyang 22 puntos.
- Sa main game sa maong liga nga giorganisar sa Brothers Ball League ubos sa liderato ni Marvin Sillar, ang JMD Automotive miposte sab sa ilang unang daog batok sa New Era, 48-42.
Gipangulohan kini sa best player niining si Mark Tanginan kinsa mirehistro og 15 puntos, pito ka rebounds ug upat ka assists, gisundan ni Gerald Lapodje nga dunay 11 puntos ug Alain Tarona sa iyang 10 puntos.
Igwalis ang iskor sa nahabiling, 4:35 sa fourth quarter, 38-all, apan si Tanginan nihimo'g back-to-back basket nga maoy nakapadaog sa JMD ni Gerald Dilao.
Nangulo sa New Era ni Chris Ivan Batitay mao si John Ray Formentera nga mikadlit og 12 puntos, gisundan ni Glen Ventolero nga dunay 10 puntos.