FIFA ‘cinderella run’ sa Filipinas natapos na

CEBU, Philippines — Natapos na ang gitawag nga “Cinderella Run” sa national women’s football team sa nasud nga Filipinas human sila gipukan sa World No.12 nga Norway sa kataposan unta nilang away sa Group elimination 2023 FIFA Women’s World Cup pinaagi sa iskor nga 6-0 didto sa Eden Park sa Auckland kagahapon.

Sa kataposan nilang duwa, daw nahigmata ang kaniadto FIFA World Cup champions nga Norway gikan sa pagkatulog kay sila maoy kinaiwitan sa grouping sa elimination round kauban ang Pilipinas nga naghupot og 3 puntos, Switzerland 6 puntos ug New Zealand 3 puntos, samtang sila 0 ang iskor.

Sa unang 30 minutos palang, nakapuntos dayon ang Norwegians og tulo batok sa World No. 46 nga Filipinas, gipapas nila anang mga minutoha ang ilang pagka-butlog sud sa duha nila ka mga duwa batok sa Switzerland ug New Zealand.

Apan sa nahibiling 30 minutos, wala pa gyud makombinsir ang Norway sa ilang kadaogan kay gipun-an pa gyud nila kini og laing tulo bisan wala pa ang ilang star player ug leading striker nga si Ada Hegerberg.

Sa sinugdanan, taas kaayo ang pagsalig ang mga Filipinas apan napupos kini sa dihang naka-iskor sa labing unang higayon ang Norwegians kortesiya ni Sofia Roman Haug sa sud palang sa 6-minutos. Mao kadto ang unang opisyal nga iskor nga nahimo sa Norwegians sa torneyo.

Sa ika-17 minutos, gipun-an pa gyud niya kini. Nasundan pa kini ni Caroline Graham Hansen. Nisamotang malas sa Filipinas sa dihang sa paningkamot ni Alicia Barker naaksidenteng napadung ang bola sa ilang goal, nakalibre og usa ka puntos ang Norwegians.

Daw gisakyan na sa tanang malas ang mga Pilipinas kay nahatagan pa gyud og penalty si Jaclyn Sawicki kay natakid niini ang usa ka Norwegian attacker. Napasulod ni Reiten ang penalty kick aron makapuntos 5-0 sa oras nga 52 minutos sa duwa. Bisan sa nagtinga na nga mga oras, gipahamtangan og red card si Sofia Harrison ug gipagawas sa pit kay matud pa nasobrahan iyang pwersa pagdepensa batok sa Norwegian nga si Thea Bjelde. Kuwang na og usa ka player ang Filipinas apan bisan pa niini, nadepensahan nila ang goal ilabi na sa paningkamot sa goalkeeper nga si Olivia McDaniel. Wala damha gikan sa gawas mibanat sa kataposang higayon ang Norwegian nga si Haug aron pagpuno og dugang iskor para sa ilang koponan.

Si Haug  maoy mipuli sa posisyon sa ilang naangol nga striker nga si Hegerberg.

Hinuon, bisan sa kapildihan bukas sa kasingkasing nga gidawat sa Filipinas ang resulta sa duwa tungod kay mao pa kini ang labing unang higayon nga nakaapil ang mga babayeng football players sa nasud sa FIFA World Cup ug nakadaog pa gyud batok sa host nga New Zealand. Ang Norway moabante na sa round 16 kauban ang Switzerland samtang natagak ang host New Zealand tungod sa 0-0 draw nilang sangka Group A match sa Dunedin. Ang New Zealand sab mao pa ang labing unang host sa FIFA World Cup nga natagak sa group stage palang, usa sa nakaingon niini mao ang ilang kapildihan batok sa Filipinas 1-0.—IBM