Celtics mipuwersa og Game 7 vs Heat

CEBU, Philippines — Luyo sa buzzer-beater ni Derrick White, gipaksit na sab sa Boston Celtics ang Miami Heat,104-103, aron pagpuwersa og Game 7 sa ilang NBA Eastern Conference finals kagahapon didto sa Kaseya Center sa Miami, Florida.

Ang Celtics nahimo nga ikaupat pa lamang nga team sa kasaysayan sa NBA nga nakatabla sa usa ka best-of-seven playoff series human malubong og 3-0.

Mas dako pa nga dungog ang makab-ot sa Celtics kon ugaling ilang mapilde ang Heat sa tinagakay nga Game 7 karong Martes didto sa ilang korta.

Kon ila kining mabuhat, ang Celtics mokulit og kasaysayan isip labing unang team sa NBA nga nakadaog sa usa ka serye human masagunsoni og pilde sa nag-unang tulo ka duwa.

Makabuak sa dughan ang nadangatan sa Heat, nga usa ka segundo na lang unta gikan sa pagtikang sa ikapito nilang NBA Finals sa wala pa sila gibaraw ni White.

Kanunay nga naglabaw ang Celtics apan nakagukod ang Heat sa katapusang kuwarter ubos sa pagpangu ni Jimmy Butler, kansang tulo ka free throws sa pinal nga tres segundos nakapa-abante sa Miami og usa ka lugas, 103-102.

Nag-atubang og eliminasyon, si Marcus Smart dali nga mitira sa iyang three-point shot nga igo lamang miuntol sa ring. Apan si White abtik kaayong milayat aron ipasud sa sipyat ni Smart dayong kapupoos sa oras.

Ang bagang panon sa Miami fans nakurat ug daw sa dili makatoo sa ilang nakita samtang ang Celtics naglumpayat sa tumang kalipay.

"Ball came to me, I made the shot. That's what I saw," padayag pa ni White agi'g paghinoklog sa iyang pagkamabayanihon. "It felt good. Everybody was asking me, 'did you get it off?' And I was like, 'yeah, I think so,' but it was so close, you never know."

"I'm happy we won. Whatever it takes. We got our backs against the wall. Just happy we won," dugang pa ni White.

Sa iyang bahin, si Heat coach Erik Spoelstra naanugonan nga wala mipabor kanila ang suwerti sa katapusang bahin sa duwa.

"That thing just bounced a different way. That's the only place it could have bounced to hurt us. I thought we had a lot of things covered on that play and sometimes things just don't break your way," dason pa ni Spoelstra.

Si Jayson Tatum maoy nangu sa Celtics uban ang 31 puntos, 11 ka rebounds ug lima ka assists samtang si Jaylen Brown midugang og 26 puntos ug 10 ka rebounds.

Si Butler mihipos og 24 puntos samtang si Caleb Martin mitali og 21 puntos sa naminghoy nga Heat, nga mag-atubang og dakong presyur sa ilang pagpanulong og balik didto sa Boston alang sa labing krusyal nga duwa sa serye diin parehong wala nay ugma nga nagpaabot sa duha ka managkaribal nga koponan.