CEBU, Philippines — Ang Calubian National High School (CNHS) mipakaging sa Cabucgayan National School of Arts and Trades (CNSAT), 53-46, sa ilang knockout final match aron dominahon ang Biliran leg sa OCCCI D-League Inter-School Basketball Tournament ning bag-ohay pa lamang didto sa Biliran gymnasium sa Leyte.
Si Mark Andre Morilla maoy mibida sa CNHS uban ang solidong double-double nga 15 puntos ug 10 ka rebounds nga iyang gipalamanan og duha ka assists ug duha ka steals hinungdan nga siya maoy gibayaw nga Most Valuable Player (MVP).
Ang mga teammates ni Morilla nga sila si Alejandro Baring ug Francis Jay-R Bonaobra naapil sa Mythical Five kauban sila sila si Charles Louie Penaflor sa CNSAT, ug Christian Miguel Dano ug Charles Jyvion Buenaventura sa Biliran National Agricultural High School (BNAHS).
Gawas nga mibulsa og P10,000, ang CNHS makigduyog sab sa ubang mga leg champions sa giatngan nga “Battle of the Best” sunod semana didto sa Ormoc Superdome sa dakbayan sa Ormoc.