Cebu City-ans misuwat og kasaysayan sa BPBL

CEBU, Philippines — Ang Team Cebu City-Abellana National School (ANS) mipakaging sa Cagayan de Oro, 43-36, aron pagkulit og kasaysayan isip labing unang national champion sa girls division sa Batang Pilipino Basketball League (BPBL) Under 18 Tournament niadtong weekend didto sa FilOil Flying V Center sa San Juan, Metro Manila.

Si Ma. Daniella Alterado maoy misidlak nga labing hayag uban ang 10 puntos, walo ka rebounds, duha ka assists ug upat ka steals alang sa Cebu City-ANS ni coach Darwin Dinoy nga mibulsa og P300,000 nga ganting salapi.   

"Salamat ni Lord nga iyang gihatag ang championship sa amoa kay ang amoa bracket puro mga strong teams especially Davao, Region 10 an NCR," kanayon pa ni Dinoy.

Mihimo sab og kasikas sila si Althea Therese Degamo, Maxim Magbanua ug Jessha Banquil nga nagkumbinar og 17 puntos alang sa ANS.

Abante lamang og tres puntos human sa tulo ka kuwarter, 30-27, ang Cebu City-ANS milusad og nagkayong 10-1 rally aron paburoton ang ilang labaw ngadto sa 12 puntos, 40-28, nga nakapabarag sa ilang mga karibal sa hingpit.   

"I would like to congratulate the players, coaching staff, support staff, parents, and sponsors for supporting the team in this 1st BPBL National Finals as the maiden champion in the girls division. Thanks also to the organizers for having this kind of tournament in the grassroots," matud pa ni ANS team consultant Francis Ramirez.

Sa boys division, ang Sambag 2-FBA ni coach Leode Garcia mitapos lamang sa ikaduhang puwesto human gipilde sa Davao, 52-61, sa kampiyonato.

Sa laing bahin, si BPBL Region 7 coordinator Van Halen Parmis mipadayag sa mainiton niyang pasalamat sa mga nagpasiugda sa liga alang sa mga batan-ong mga basketbolista lukop nasud.

"As a regional coordinator, I am very grateful to the organizers of BPBL headed by coach Ron Camara. Big thanks also to all the participating teams that challenged and tested the quality of the Cebuano grassroots. The impressive podium finish of Abellana National School being the girls national champions and Brgy. Sambag 2 FBA as first runner-up in the boys division is the result of long time of dedication, passion and hardwork of the coaches, players and parents," matud pa ni Parmis.

"Back in the day, this dream of reaching and showcasing the Cebuano talents was planted to me by my mentor sir Rico Navarro, that's why we don't get tired of finding avenues for our grassroots to flourish. To everyone who supported us from Day 1 until the National Finals, daghang salamat. Ato ni Cebu!," panapos pa ni Parmis.