Knicks gipakuratan ang Boston Celtics

CEBU, Philippines — Si Julius Randle mipatuasik og 37 puntos aron pangulohan ang New York Knicks ngadto sa 120-117 nga kadaogan sud sa overtime batok sa nagharing Boston Celtics sa NBA kagahapon didto sa TD Garden sa Boston, Massachusetts.

Dako sab og naambag si Jalen Brunson nga mihipos og 29 puntos, upat ka rebounds ug pito ka assists alang sa Knicks, nga mipatilaw sa Celtics sa labing una niining tulo ka sunod-sunod nga pilde ning season.

Si Jayson Tatum mipupo og 35 puntos ug 14 ka rebounds samtang si Jaylen Brown midugang og 22 puntos ug siyam ka rebounds apan parehong nangahoyhoy ang ilang abaga sa habig sa Celtics.

Didto sa Phoenix, gibugha sa Dallas Mavericks ang Suns apan wala makumpleto ang ilang selebrasyon gumikan kay ang alas nilang si Luka Doncic nakahiagum og angol sa wala niining tiil. Sa laing duwa, gipakuratan sa Detroit Pistons ang Brooklyn, 130-122, bisan pa'g si Kyrie Irving mipabuto og 40 puntos alang sa Nets.

Si Saddiq Bey mi-iskor og 25 aron pangulohan ang walo ka Pistons nga mikadlit og double figures apil na niini si Alec Burks nga mitapos uban ang 20 puntos.

Sa ubang mga resulta, ang Charlotte Hornets mi-ihaw sa Chicago Bulls, 111-96, samtang sila si Paul George ug Kawhi Leonard nagkumboya'g 62 puntos aton ituboy ang LA Clippers ngadto sa 138-100 nga paglampornas sa San Antonio Spurs.