CEBU, Philippines — Ang pambatong world-ranked light flyweight contender sa ARQ Stable nga si John Paul "Angas ng Cebu" Gabunilas mopas-an og laing mabug-at nga misyon sa iyang karera sa dihang iyang sangkaon ang kahadlokang si Jesse "Little Giant" Espinas sa Oroquieta City sa main event sa "Engkwentro 8" boxing card sa ARQ Sports Promotions karong adlawa didto sa San Fernando Sports Complex sa lungsod sa San Fernando, habagatang bahin sa Sugbo.
Si Gabunilas, nga nagtangag og 8-1 rekord uban ang 6KOs, maoy inilog sa tapad apan ang OPBF Youth 108-pound champion nasayud nang daan nga dili basta-basta nga kontra si Espinas kay beterano kaayo kini sa 25 ka away uban ang 20 ka daog, 11 niini pinaagi sa knockout.
Og kay ang iya mang kaugmaon ang nakataya, ang WBC rated No.29 nga si Gabunilas andam nga mosagubang sa malisud nga hagit nga nag-atang kaniya sa unahan.
"Una sa tanan, nagpasalamat ko sa Ginoo ingon man sa manager nako nga si sir Jason ug mam Eva Mari Arquisola nga gitagaan ko nila'g opportunity nga maka-away og usab," matud pa ni Gabunilas. "Ikapasalig nako nga nindot gyud ni nga duwa."
"Di ko kapasalig kung matumba nako ako kontra kay this is a big challenge for me kay beterano ug mas eksperyensiyado kaayo nako akong kontra," dugang pa sa garbo sa Barangay Inayawan, dakbayan sa Sugbo. "Pero ganahan ko ani nga challenge mao nang mamingkamot ko ug buhaton tanan kutob sa akong mahimo aron modaog."
Sa eksplosibo sab nga mga supporting bouts, si Ramil "The Sharp" Macado, Jr. makigpinaksitay ni Ramil Antaran, si Bryan James "Wild Fury" Wild mohamag ni Jess Rey Waminal, si Rodel "The Hulk" Wenceslao makighilam-osay og kumo ni Argie Toquero, samtang si Bryx "The King" Piala makigbnugno ni Ryan Rey Ponteras.
Sa laing sangka nga angayang lantawon sa mga fans, si OPBF Silver flyweight titlist ug WBC rated No.28 April Jay "Astroboy" Abne (11-1, 5KOs) makigharong ni Richard "Explosive" Claveras (19-10-2, 16KOs).
Mobanat sab sila si Rodex "The Tank" Piala batok ni Ponciano Rimandiman, si Yerroge "The Scientific" Gura batok ni Arnold Garde, si Ian Paul "The Assassin" Abne batok ni Ronald Alapormina, ug si Berland "The Triggerman" Robles batok ni Michael Kinaadman.