Labing unang Badbeat Basketball League kasado na
CEBU, Philippines — Plastada na ang tanan alang sa labing unang Badbeat Basketball League (BBL) season nga gikatakdang mosikad karong Oktubre 22 diha sa Sacred Heart Center Sports Club sa may dalan D. Jakosalem, dakbayan sa Sugbo. Si BBL commissioner Mardion Delima nagkanayon nga ang ilang liga abli sa mga magduduwa nga dunay gitas-on nga 5'11" paubos nga dili kanhi mga varsity ug commercial players.
Dul-an sa 50 ka teams ang gipaabot nga mopakita'g aksiyon sa torneyo nga modagan og kapin sa duha ka bulan.
Kini naglangkob sa Hustler’s, Serenis North Dribblers, Side Hustle, Barakodas, Schwartz, Happy Brew, Midland Hoopers, Flip Basketball, Gin’s Printer, Hoopers, CJ's-CDC, Project Hoops, Peacemaker, Stallion, CURC Ballers, Prayboys, Cebu GBA Amigos, Fernandez Optical, Silogan ni Gian, Team Fuentes, ug SC Ballers.
Naa sab sa listahan ang Houndz, RW Freight Forwarders, Viking’s, Brotherhood Tigers, Icypay, Banica, Kaiju, Kokoklay, Go Online Solution, Du Ek Sam, Lomax Events, Team Puma, Chancellor, Phantoms, BGC Boys, GSR Motorshop and Babershop, Frontyard (Grit & Grind Kings), Underdog, Labangon, ug Team Joeric. Bahinon sila ngadto sa walo ka brackets diin upat ka teams matag bracket ang mo-abante sa sunod nga hugna. Gikan dinhi determinahon ang mga semifinalists dayon na ngadto sa mga finalists.
Gipasiugdahan sa Badbeat Sportswear, ang BBL nakaangkon dayon og hugot nga suporta gikan sa sa Harbour City Dimsum House, Inc. pinaagi sa direktor niining si Lorraine Uytengsu-Calisang uig manedyir nga si Steven Kokseng isip corporate sponsor sa liga. Tipik sa ilang gikasabotan mao ang paghatag og P500 nga balor sa Dimsum House gift voucher alang sa Player of the Week sa tibuok nga bahin sa kompetisyon.
- Latest
