CEBU, Philippines — Hingpit nang nakuha sa Zynergia Wellness and Wealth ug Donling Aircon and Refrigeration Services ang otomatik nga lingkoranan sa semifinals human sa ilang kadaogan batok sa tagsa-tagsa nilang kaatbang sa nagkainit nga aksiyon sa Joko Builders Cup 2022.
Nabira sa Zynergia ang no. 1 spot dihang ilang gibihag ang JJS Electrical Supply and Services sa iskor nga 70-61, samtang ang Donling maoy no. 2 pinaagi sa pagpilde sa Gootsource Solution International (GSI), 69-67.
Ang managsuong Lumoya nga silang Voltaire ug James Carl maoy misalida og maayo ilabi na sa hinapos nga bahin sa duwa nga nakatabang og dako sa kadaogan sa Donling. Si Voltaire mitikdol og 13 puntos, samtang si James Carl mitimang og 12 puntos. Hinuon, si Roldan Daug maoy best player of the game human mirehistro og 14 puntos, unom ka rebounds ug duha ka assists. Si Joemari Arupo mihirit sab og 12 puntos sa Donling ni team manager Romeo Quilaton Jr.
Misihag na unta ang daog alang sa GSI dihang labaw sila og siyete puntos sa nahabiling 2:04 sa fourth quarter, apan ang Donling sa pagpangulo sa Lumoya brothers mihimo’g trapping defense nga nakaguba sa duwa sa GSI ug nailog ang labaw, 69-67 sa katapusang 45 segundos.
Mahatod unta ang duwa ngadto sa overtime, apan ang itsa ni Geory Apas sa nahabiling dos segundos mikagar nga nakapapas sa ilang paglaum ning maong liga nga gipasiugdahan nilang Joeffrey Banaag ug Marvin Sillar.
Upat sab ka player sa GSI ni Ivan Llesol ang mihipos og double figures sa pagpangulo ni Deyrrel Rollon sa iyang 21 puntos, gisundan ni Apas nga adunay 15 puntos, Darwin Rollon sa iyang 12 puntos ug Kent Sillar nga mitimbre’g 10 puntos.
Sa laing bahin, si Jessie Sanchez mihipos og 24 puntos, unom ka rebounds ug tulo ka assists aron mangu sa Zynergia ug ingon man best player of the game, samtang si Erick Sanchez mitampo’g 14 puntos sa team ni Alvin Taneo.
Ang JJS Electrical ni league organizer Joeffrey Banaag gipangulohan ni Soc Ramas pinaagi sa iyang 17 puntos, gisundan ni Joshua Banaag sa iyang 16 puntos.
Midaog sab ang Jot Trucking Service batok sa Domelsky Purified Drinking Water, 93-73 ubos sa pagpangulo ni Arjay Mendoza nga mikadlit og 19 puntos, pito ka rebounds ug tulo ka assists aron tahuron isip best player of the game.
Sila si JJ Vestra, RJ Bautista ug Jeremiah Rivera naka-double digits sab sa kadaogan sa team ni Jeffrey Tagacanao.
Ang napildeng Domelsky ni Melchor Almonicar gipangulohan sab ni Jun Dronio sa iyang 19 puntos, gisundan ni AJ Geronca nga adunay 17 puntos, Ryan Geonzon sa iyang 11 puntos ug Jay Arellano nga dunay 10 puntos.