Coach Jeff dunay bag-ong hagit sa iyang adbokasiya sa sports

CEBU, Philippines — Ang tinamod nga Sugbuanong basketball coach ug skills trainer nga si Jefferson "Jeff" Codera mag-atubang og bag-ong hagit sa iyang adbokasiya kabahin sa grassroots basketball.

Kini human ang munisipalidad sa San Remigio sa amihanang bahin sa Sugbo ubos sa pagpangu ni mayor Al Pestolante mi-isyu og Executive Order sa miaging semana nga opisyal nga nagtudlo ni Codera isop head coach ug consultant for basketball development sa ilang lungsod.

"Basketball is really his advocacy that is why we are very grateful that coach Jeff accepted our offer," matud pa ni Pestolante. "This is a blessing from the Lord. Gusto gyud nako nga i-develop ang sports sa among lungsod and I believe he will be a big contributor for this."

"Looking at what he has accomplished in life, this is the least we can do to recognize him because he's truly a pride of Cebu," dughang pa ni Pestolante.

Ang 40-anyos nga si Codera taas na gyud og naabot gikan sa ubos niyang sinugdanan isip usa ka dispatser og dyip ug pick-up player. Kabahin na siya karon sa NBA Golden State Warriors training camp didto sa California ug dunay Gold Coach License gikan sa USA Basketball.

Gawas sa pipila ka mga collegiate ug PBA players, si Codera naka-train na sab og pipila ka mga national players sama nilang Reggie Hearn sa Amerika, Adrian Zamora sa Mexico, ug Jeff Chan ug Carl Tamayo sa Gilas Pilipinas.

"Dako gyud kaayo namong garbo nga ipaambit ni coach Jeff ang iyang adbokasiya kabahin sa grassroots basketball sa mga San Remigiohanons. Mao nga amo ihatag ang tanang suporta ngadto niya uban ang tinguha nga makatabang siya pagpalambo sa sports sa among dapit," dason pa ni konsehal Lou Ornopia, nga usa sab ka award-winning sportsman nga giila sa Sportswriters Association of Cebu (SAC).

Sa iyang bahin, si Codera gibati og tumang kahinam nga ipaambit ang tanan niyang mga nakat-onan luyo sa nagkayo niyang tinguha nga tabangan pagbaid ang abilidad sa mga batan-on nga nangambisyon nga mamahimong basketbolista ilabi na kadtong mga hinikawan sa maayong palad didto sa amihanang bahin sa Sugbo.

"Lipay kaayo ko kay gitagaan ko nila og pwesto sa ilahang lungsod ug gidawat ko nila kinasingkasing," padayag pa ni Codera. "Akoang gidawat ang hangyo ni mayor ug sa taga San Remigio kay nindot kaayo ilahang vision sa mga kabatan-onan. To empower the youth gyud and ang first priority nila is sports not only in basketball but sa tanan sports."

"Nindot sad kaayo kay full support sila sa akoa about sa himoon namo nga free basketball clinic in every barangay ug sa development program namo sa mga basketball players diha San Remigio," dugang pa ni Codera, nga misikad na sa serye sa iyang barangay-based training camps kagahapon didto sa Argawanon. "Ang pinakanindot namo nga plano is to develop a world-class program para sa mga athletes diri sa lungsod sa San Remegio. Mao na among goal ug hinaut nga ma-achieve na namo sa umaabot."