CEBU, Philippines — Ang jersey nga gisul-ot ni basketball legend Michael Jordan atol sa Game 1 sa 1998 NBA Finals, nga maoy katapusang higayon nga nakadaog siya og titulo, gitakada nga isubasta kon i-auction sa Sotheby's karong Septiembre sa gibana-banang kantidad nga $3-5 million.
Ang bililhong pula nga uniporme sa Chicaco Bulls diin nakatatak ang No.23 ni Jordan sa luyo mao pa lamang ang ikaduhang jersey nga gisul-ot ni Jordan sa unom niya ka kampiyonato nga ibaligya sa usa ka subasta.
Sagad sa mga jersey ni Jordan sa NBA Finals napabilin sa mga pribadong kamot apan ang usa niini iyang gidonar sa Smithsonian National Museum of African American History and Culture.
Si Jordan, nga karon 59 anyos na, nakabira og unom ka korona sa Bulls sa wala pa siya mihaw-as gikan sa pagkaretirado niadtong 2001 aron moduwa sud sa duha ka seasons uban sa Washington Wizards.
Ang katapusan niyang season uban sa Bulls gidetalye sa dokumentaryo sa ESPN ug Netflix nga giulohan og "The Last Dance" nga gipagawas niadtong 2020.
Ang maong jersey ni Jordan unang i-display sa publiko didto sa Monterey, California sa dili pa kini ibiyahe sa New York diin kini makita sa mga fans atol sa online auction nga gi-iskedyul sa Septiembre 6-14.