SHAABAA season 25: Cebu Landmasters, Dynacast, Xchange Forex pabiling way pilde

CEBU, Philippines — Ang Cebu Landmasters 2003, Dynacast 2001 ug Xchange Forex 2000 milampornas sa tagsa-tagsa nila ka mga kontra aron pagpabiling way pilde sa Sacred Heart Ateneo Alumni Basketball Athletic Association (SHAABAA) Season 25 niadtong Dominggo didto sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, dakbayan sa Mandaue. Si Moncrief Rogado mipabuto og 33 puntos uban ang 14 ka rebounds ug upat ka assists samtang si Justin Huang miratsada og 28 puntos, 10 ka rebounds, lima ka assists ug tulo ka steals sa dihang gibugha sa Cebu Landmasters 2003 ang 04 the Win 2004, 80-65, aron pahugtan ang ilang pagkupot sa solong liderato sa Division B bitbit ang perpektong 3-0 record.

Gikan sa 26-15 nga sinugdanan, misamot pa ang kainit sa Cebu Landmasters aron paburoton ang ilang labaw ngadto na sa 69-45 human sa tulo ka kuwarter. Si Franco Te mitali og 29 puntos, 18 ka rebounds ug upat ka steals sa pilderong Batch 2004. Sa Division A, ang Dynacast 2001 ug Forex Xchange 2000 parehong mirehistro sa ikaduha nilang sagunson nga daog.

Si Mark Jeffrey Hing ug Erwin Ngo nagkumboya'g 29 puntos, 10 ka rebounds ug upat ka assists sa dihang gipampornas sa Dynacast ang Vivant Corenergy 1994, 83-57, samtang si Sergs Al Gobui mitimbre og 29 puntos, walo ka rebounds, duha ka assists ug unom ka steals aron pangulohan ang Forex Xchange ngadto sa 71-58 nga pagpakaging sa Mandaue Eco Glass Batch 1992. Mihimo sab og kasikas si Jason Arquisola uban ang 13 puntos, walo ka rebounds, duha ka assists ug tulo ka steals samtang si John Paul Cabrera midonar og 12 puntos, lima ka rebounds, upat ka assists ug tulo ka steals alang sa Dynacast nga dominante kaayo gikan sa pagsugod dayon na sa paglansang og 64-37 nga bentaha padung sa pinal nga 10 minutos sa aksiyon.

Wala sab magpabitin si Dave Ting nga mipupo og 13 puntos, tulo ka rebounds ug tulo ka steals ingon man si Christian Michael Tiongko nga mikimada og 11 puntos ug unom ka rebounds  alang sa Xchange Forex nga milatos sa Batch 1992 sa tunga-tungang mga kuwarter aron pag-angkon og lisud apson nga labaw, 59-36.

Sa laing resulta, si Alan Kent Ong mikolekta og 15 puntos, walo ka rebounds ug lima ka assists, si Jeremy Ryan Huang mi-iskor og 11 uban ang walo ka rebounds samtang si Jan Michael Sarcol midonar og 10 puntos sa dihang gipukan sa AutoLAB 1999 ang GEF Daikin 1998, 62-58.