S.I.V, Aiperon wa gihapo'y pilde sa Hoops Arlon Cup

CEBU, Philippines — Padayong miratsada ang S.I.V ug Aiperon International Fighters sa nagkainit nga aksiyon sa Hoop Nation Arlon Cup Season 1 niadtong weekend didto sa City Sports Club-Cebu gym.

Si Jezreel Padilla mipupo og double-double uban ang 16 puntos ug 18 ka rebounds sa dihang gipaksit sa S.I.V ang Prayboys, 72-64, aron paghugtan ang ilang pagkupot sa solong liderato sa West Division bitbit ang perpektong 7-0 record.

Wala sab magpa-alkansi si Amir Batiancila nga mitimbre og 20 puntos, upat ka rebounds ug duha ka blocks sa dihang gilampornas sa Aiperon ang Cebuanos, 65-52, alang sa ikaunom nilang sagunson nga daog.

Sa lain pang bugno sa West, ang RKC mipayaka sa PJL Hoopers, 78-73, alang sa una nilang daog.

Si Paul Sungahid mipabuto og 38 puntos uban ang tulo ka rebounds ug usa ka steal alang sa RKC nga mipakgang sa lima ka duwa nilang malas.

Sa East, ang Wolves mikastigo sa AEG, 60-37, alang sa ikalima nilang daog sud sa walo ka duwa.

Si Marvin Agruda maoy bida sa Wolves uban ang 15 puntos,  pito ka rebounds ug duha ka assists.

Giorganisa ni Hoop Nation founder ug commissioner Adrian Dy, ang labing unang season sa liga gipaluyohan sa TUF Barbershop I.T. Park, First 5 Sports Lounge & Cafe, Boulevard Water Depot, The Trillium Residences At Molave, Ronex Tolin Photography, ug Prism Live.