CEBU, Philippines — Ipadala ang labing maayo sa tanang mga maayo.
Mao kini ang gihatag nga tambag ni basketball legend Ramon Fernandez human sa makapadismaya nga kampanya sa Gilas Pilipinas diin kini mipugnit lamang og silver medal sa bag-ohay pang natapos nga 31st Southeast Asian (SEA) Games didto sa Hanoi, Vietnam.
“We have to choose the best possible players, we cannot belittle them anymore just like the old days when we can send our college players and still beat them,” matud pa ni Fernandez, nga commissioner sa Philippine Sports Commission ug maoy chef-de-mission sa nasud didto sa Hanoi SEA Games.
“We can’t do it now because our neighbors have tremendously improved,” dugang pa niya.
Giluwatan sa 19-time PBA champion ug four-time MVP ang maong pamahayag usa ka semana human ang Gilas ni coach Chot Reyes nahagba sa mga kamot sa Indonesia ni coach Rajko Toroman nga nagtuldok sa 33 ka tuig nilang dominasyon sa SEAG basketball.
Bisan tuod og ang nasud mipadala og dekalibreng koponan nga gipangulohan sa Sugbuanong higante nga si Junemar Fajardo, si Fernandez nagtoo nga gipalig-on pa unta ang ilang puwersa.
“I was saddened because I was expecting a win. But I have to give it to our opponents, they scouted us well and they came in really prepared,” dason pa ni Fernandez, nga sakop sa national team nga nakalangkat og gold sa 1972 FIBA Asia Under-18 Championship ug ingon man sa 1973 FIBA Asia Championship nga pulos giduwa didto sa Manila.