CEBU, Philippines — Ang beteranong point guard nga si Chris Paul sa Phoenix Suns ug ang teammate niining si Devin Booker ginganlan kagahapon nga mga sakop sa NBA All-Star reserves.
Gibotohan sab sa mga NBA coaches isip reserve players gikan sa West sila si Rudy Gobert ug Donovan Mitchell sa Utah Jazz, Luka Doncic sa Dallas Mavericks, Karl-Anthony Towns sa Minnesota Timberwolves, ug Draymond Green sa Golden State Warriors.
Sa East, gihagpat nga mga reserves mao sila si Darius Garland sa Cleveland Cavaliers, Jayson Tatum sa Boston Celtics, James Harden sa Brooklyn Nets, Zach LaVine sa Chicago Bulls, Fred VanVleet sa Toronto Raptors, Jimmy Butler sa Miami Heat, ug Khris Middleton sa Milwaukee Bucks.
Sa miaging semana, sila si LeBron James sa LA Lakers ug Kevin Durant sa Nets ginganlan nga team captains human gidominar ang botasyon sa mga fans.
Isip team captain, sila si James ug Durant maoy mopili kon kinsa ang gusto nilang ikauban sa tagsa-tagsa nila ka koponan sa giatngan nga NBA All-Star Game karong Pebrero 20 didto sa Cleveland, Ohio.
Wala pa hinooy klaro kon ang duha ka superstars makaduwa ba sa All-Star. Si Durant padayon pang nagpa-alim sa na-angol niining tuhod samtang si James nakapalta og upat ka sagunson na nga duwa gumikan kay mihubag ang tuhod.