CEBU, Philippines — Mihimo dayon og impresyon si reigning MVP Nikola Jokic sa iyang pagbalik og duwa pinaagi sa pagkadlit og 24 puntos samtang si Aaron Gordon midugang og 20 puntos sa dihang gimamak sa Denver Nuggets ang Miami Heat, 120-111, sa NBA kagahapon didto sa FTX Arena sa Miami, Florida.
Si Jokic, nga nakapalta og upat ka duwa gumikan kay nayayay ang kamot, milangkat sab og 15 ka rebounds ug mipasa og pito ka assists alang sa Nuggets nga mipakgang sa unom ka sunod-sunod nilang malas. Dako sab og naambag sila si Bones Hyland ug Will Barton nga nagkumboya og 33 puntos alang sa Nuggets, nga milusad og nagkayong 12-0 run sa ikaduhang kuwarter aron pagrehistro og 50-35 nga labaw. Ila pa kining giinat ngadto sa 20 puntos sa halftime, 63-43, nga nakapabarag sa Heat sa nahibiling bahin sa aksiyon.
Si Bam Adebayo mikimada og 24 puntos ug 13 ka rebounds alang sa Heat nga mitikang sa korte nga wala ang duha nila ka leading scorers nga sila si Jimmy Butler ug Tyler Herro nga parehong dunay dili maayong gipamati sa lawas.
Sila si Max Strus ug Caleb Martin nagkuminar og 37 puntos samtang si Kyle Lowry mitali og 17 puntos ug 14 ka assists sa pilderong Heat.