Seguro nang maka-bronze sa Olympics boxing
CEBU, Philippines — Gipatukay-ang ni Eumir Felix Marcial si Arman Darchinyan sa Armenia sud lamang sa usa ka hugna aron pag-abante sa men’s middleyweight semifinals sa 2020 Tokyo Olympics boxing event kagahapon didto sa Kokukigan Arena sa Japan.
Gumikan sa naglagiting niyang kalamposan, gigarantiyahan ni Marcial ang Pilipinas og bronze medal. Dugang kini sa seguradong silver sa kababayan niyang si Nesthy Petecio, nga mosuway og langkat sa labing unang boxing gold sa nasud sa Olympics sa dihang iyang sangkaon ang pambato sa Japan nga si Sena Irie sa women’s featherweight finals sa alas 12:05 sa hapon karong Martes, Agosto 3.
Agresibo kaayo ang 25-anyos nga si Marcial gikan sa pagsugod hinungdan nga nagpunay na lang og depensa si Darchinyan, nga sama kaniya na-train usab sa tinamod nga si Freddie Roach didto sa Wild Card Gym sa Hollywood.
Wala magdugay, si Marcial kalit nga milabay og makabungog nga right hook nga mitaop sa nawong ni Darchinyan hinungdan sa pagkalukapa niini sa hingpit sa nahibilin nga 49 segundos sa unang hugna. Wala na makabarog pa si Darchinyan hinungdan nga dali nga gi-undang sa reperi ang away sa 2:11 nga marka. Malisud pa hinoon nga tahas ang sagubangon ni Marcial gumikan kay iyang sangkaon sa semis mao man ang world champion nga si Oleksandr Khyzhniak sa Ukrainie karong Huybes, Agosto 5, sa alas 2:05 sa hapon.