Human mihimo og kasaysayan P35.5m, balay ug condo madawat ni Hidilyn Diaz

CEBU, Philippines — Gawas sa dili hitupngang dungog ug garbo, mura sab og nakadaog sa lotto si Hidilyn Diaz sa iyang paghatag sa Pilipinas sa labing una niining gold medal sa Olympics.

Niadtong Lunes sa gabii didto sa Tokyo International Forum sa Japan, ang 30-anyos nga si Diaz mikulit og kasaysayan human gidominar ang women's 55kg division sa weightlifting event sa 2020 Tokyo Olympics.

Mao kadto ang unang gold sa nasud sukad una kinining misalmot sa prestihiyosong torneyo nga mahitabo kausa lamang sud sa upat ka tuig niadtong 1924 Paris Olympics.

Si Diaz nakamaneho og 97kg sa snatch ug dayon mialsa og bag-ong Olympic record nga 127kg sa clean and jerk.

Olympic record sab ang total niyang 224kg nga naghatag kaniya og bulawang medala nga seguradong dili mahikalimtan ug matatak sa kanunay sa dughan ug kasingkasing sa matag Pinoy ug sa umaabot pang henerasyon sa mga atleta.

“Grabe si God. Akala ko imposible, akala ko hindi kaya ng Pinoy, pero ibinigay sa atin ni God,” matud pa ni Diaz sigun sa taho ni Nelson Beltran sa The Philippine STAR.

“Hindi ko inakala, tapos eto winner tayo at Olympic record pa,” dugang pa sa garbo sa Zamboanga City. Gibuntog ni Diaz ang labing sikit niyang karibal gikan sa China nga si Qiuyun Liao og usa lamang ka lugas. Si Liao mialsa og kinatibuk-ang 223kg aron pagpugnit sa silver samtang si Zulfiya Chinshanlo sa Kazakhstan maoy milukat sa bronze uban ang 213kg.

Gumikan sa pagbisbis niya sa 97 ka tuig nga huwaw sa bulawang medalya sa Pilipinas sa Olympics, daw naka-jackpot sab sa lotto si Diaz.

Kini gumikan kay gikatakda man siyang modawat og dili mominus P35.5 million nga insentibo gawas sa house and lot didto sa Tagaytay kortesiya ni Philippine Olympic Committee (POC) President Abraham "Bambol" Tolentino ug usa ka luho nga condo unit sa Eastwood gikan sa Megaworld Corp. nga gipanag-iya sa bilyonaryong si Andrew Tan.