CEBU, Philippines — Napilde ang Team USA sa labing unang higayon sud sa 16 ka tuig.
Kini human ang gamhanang koponan nga gipangulohan ni 11-time NBA All-Star Kevin Durant gipayaka sa France, 83-76, sa una nilang duwa sa basketball event sa 2020 Tokyo Olympics niadtong Dominggo sa gabii didto sa Japan.
Mao kadto ang unang pagkahagba sa US team sukad niadtong 2004 Athens Olympics.
Gawas sa balanse nilang opensiba ubos sa pagtimon nilang NBA players Rudy Gobert ug Evan Fournier, giposasan sab sa France si Durant ngadto lamang sa 10 puntos.
Si Fournier, nga kasamtangan sakop sa Boston Celtics, maoy nangu sa France uban ang 28 puntos.
"I tried to be aggressive. As an NBA player I know the players we were facing. We had to show the team how to attack them," matud pa ni Fournier, kansang 3-pointer nakapalabaw sa France og dos puntos, 76-74, sa nahibilin nga 57 segundos sa duwa.
Human nasipyat si Durant sa giitsa niining tres, ang France milansang sa krusyal nilang mga free throws aron pagsilyo sa ilang daog. Ang US naglaraw nga makabawi sa sunod nilang duwa batok sa Iran karong Miyerkules.