CEBU, Philippines — Ang nahibilin nga Pinoy'ng bilyarista nga si Roberto Gomez nanamilit na sab sa hingpit sa 2021 World Pool Championship didto sa Marshall Arena sa Milton Keynes, England.
Nakasud unta si Gomez sa Final Round of 16 human gipukan sila si Muhummed Daydat sa South Africa, 11-2, ug Aloysius Yapp sa Singapore, 11-7.
Apan ang 42-anyos nga garbo sa Zamboanga napakyas pag-angkon og luna sa quarterfinals human siya gipalagpot sa Amerikanong si Skyler Woodward, 11-7, sa tinagakay nilang duwa.
Ang Pilipinas prominente kaayo sa maong kalibutanhong torneyo tungod kay pipila na ka mga Pinoy ang nakampiyon niini sama nilang Efren "Bata" Reyes, Francisco "Django" Bustamante, Ronato Alcano, ug Carlo Biado.
Wala lang hinoon sila'y suwerti ning higayona ilabi na kay gamay ra kaayo ang mga Pinoy nga nangapil tungod sa pandemiya.