CEBU, Philippines — Mipaarak og 24 puntos si Paul George aron mangu sa pito ka mga magduduwa sa Los Angeles Clippers nga mipugnit og double figures sa dihang ilang gipilde ang LA Lakers, 118-94 sa NBA kagahapon didto sa Staples Center sa Los Angeles, California.
Sa maong kadaogan, ang Clippers nahimutang na karon sa ikatulo nga dapit sa Western Conference standing uban ang 45-22 win-loss record.
Si Kawhi Leonard mitampo og 15 puntos, walo ka rebounds ug unom ka assists, samtang si Ivica Zubag miamot og 14 puntos ug walo ka rebounds sa Clippers nga nakasud sa playoff sa ikasiyam ka higayon sud sa 10 ka seasons. Ang Lakers nga gihamok og injuries, gipangulohan ni Kyle Kuzma pinaagi sa iyang 25 puntos.
Wala motiwas og duwa si Anthony Davis nga nahasol sa lisa sa iyang tuong bitiis igo lang mitimbre og kuwatro puntos sa Lakers, kinsa napilde kaupat sa lima ka duwa. Aduna na lang sila'y nahabiling unom ka duwa sa regular season.
Ang Lakers abante og kuwatro puntos sa sayong bahin sa second period, apan ang Clippers mibawos pinaagi sa 11 ka sunod-sunod nga puntos aron moposte og double-figure nga bentaha. Mibingat pa ang labaw ngadto na sa 65-42 sa halftime.
Si DeMarcus Cousins adunay nuybe sa iyang 11 puntos sa second period. Mihimo siya usa ka 3-pointer, usa ka steal ug dunk nga kabahin sa ilang 8-0 nga rally.
Sa lain pang mga resulta, ang Dallas Mavericks midaog sa Brooklyn Nets, 113-109, misungag og daog ang Chicago Bulls batok Charlotte Hornets, 120-99, ang Washington Wizards mipilde sa Toronto Raptors, 131-129, midaog sab ang Detroit Pistons sa Memphis Grizzlies, 111-97, ang Indiana Pacers mibihag sa Atlanta Hawks, 133-126 ug ang Golden State Warriors mipukan sa Oklahoma City Thunder, 118-97.