CEBU, Philippines — Giuswag sa Pilipinas VisMin Super Cup ang ilang mga duwa kagahapon human nakontrobersiya ang duwa tali sa ARQ Builders/Lapu-Lapu City Heroes ug sa Siquijor Mystics niadtong Miyerkules didto sa Alcantara Civic Center sa lungsod sa Alcantara, amihanan-sidlakan sa Sugbo.
Ang mga duwa nga gipospon kagahapon mao ang MJAS Zenith Talisay City Aquastars batok Siquijor ug Dumaguete batok Tubigon-Bohol Mariners.
Mobalik hinuon karon ang mga duwa sa liga.
Gipospon ang duwa sa Lapu-Lapu ug Siquijor gumikan sa power interruption didto sa Civic Center.
Labaw ang Lapu-Lapu City, 27-13 sa halftime dihang nawagtang ang elektrisidad.
"We had a power interruption here in Alcantara. Though we have a generator, it could not sustain our internet which has forced us to postpone the game," matud pa ni VisMin Cup chief operating officer Rocky Chan.
Ang Lapu-Lapu Heroes nga tinguhang molansang sa ikatulong sunod-sunod nga daog miarangkada dayon aron moposte og 23-5 nga bentaha human sa unang 10 minutos sa duwa. Ila lang sab nila gipaiskor ang Mystics og kuwatro puntos sa second period.