CEBU, Philippines — Plano ni Utah Jazz cager Jordan Clarkson nga moduwa og balik sa Gilas Pilipinas sa 2023 FIBA World Cup.
Sa usa ka balita nga gipublikar sa New York Times mibutyag nga ang Fil-Am nga si Clarkson nagtinguhang moduwa og usab alang sa Pilipinas duha ka tuig gikan karon dihang ang nasud usa sa co-hosts sa FIBA uban sa Japan ug Indonesia.
Ang World Cup gilauman sab nga qualifier alang sa 2024 Paris Olympics, sama sa 2019 edition sa China.
“Clarkson plans to return to Gilas Pilipinas in 2023, he said, when the team takes part in Olympic qualifying competitions, including the World Cup, which the Philippines is co-hosting,” suwat pa ni Scott Cacciola sa iyang balita.
Ang World Cup mao unya ang ikaduhang pagduwa ni Clarkson sa Gilas Pilipinas dihang niduwa siya niadtong 2018 Asian Games didto sa Jakarta human hatagi og pagtugot sa NBA ug sa iyang inahang koponan nga Cleveland Cavaliers.