CEBU, Philippines — Mihimo og kasaysayan si Jaja Santiago isip unang Filipino volleyball player nga nidaog og korona sa langyaw nga liga sa Japan V. Leagues V Cup niadtong Domingo didto sa Ota City General Gymnasim sa Tokyo.
Dihang ang iyang giduwaan nga team Saitama Ageo Medics mipukan sa NEC Red Rockets sa upat ka sets, 26-24, 20-25, 25-21, 25-17.
Ang 6-foot-5 Filipina import nga si Santiago miiskor og 11 puntos uban ang siyam ka attacks ug duha ka blocks sa maong kadaogan sa Ageo Medics nga miharos sa pito ka duwa sa 2021 V Cup tournament.
Ang produkto sa National University (NU) nagsugod og duwa sa Ageo Medics niadtong 2015. Nidaog siya og bronze medal uban sa koponan sa 2019-2020 V League season. Siya ang unang Filipino volleyball player nga mitungtong sa podium sa international pro league.
Sila si Yuka Soto ug Mami Uchiseto maoy nangu sa Ageo Medics nga parehong miiskor og 15 puntos, samtang si Shainah Joseph miamot og 14 puntos aron maghari sa gipamub-an nga Japan V. League alang sa dili miyembro sa Japan women's volleyball pool para sa Olympics.
Si Ayumi Yoshida maoy nangu sa Red Rockets pinaagi sa iyang 22 puntos, gisundan ni Misaki Yamauchi nga adunay 15 puntos alang sa ilang koponan nga igo lang nidaog og sillver medal.