CEBU, Philippines — Aduna na'y bag-ong miyembro ang Alaska Aces human nila gipapirma og kontrata ang ilang rookies nga silang Ben Adamos ug Taylor Browne.
Kini ang gipahibalo sa kampo sa Aces pinaagi sa ilang social media account niadtong Martes.
Wala hinuon gibutyag ang termino sa kasabotan.
Ang 6-foot-7 nga si Adamos gikuha isip sixth overall sa Alaska human niduwa sa kolehiyo uban sa Technological Institute of the Philippines, San Beda ug sa Perpetual.
Gawas sa pagkuha ni Adamos, ang Aces nipili sab sa 6-foot-3 nga si Browne, produkto sa University of British Columbia, isip No. 16 pick human mihimo og dakong impresiyon sa workouts. Bisan wala maila sa kadaghanang basketball fans, ang 23-anyos nga si Browne sinati na sa kompetisyon sa Pilipinas dihang nakaduwa niya ang Mighty Sports sa 2019 Jones Cup.
Si Alaska team governor Dickie Bachmann, miingon nga ang laing draftees nga silang RK Ilagan ug Alec Stockton papirmahon sab og kontrata sa koponan sa umaabot nga mga adlaw.
“Next two players, later in the week or early next week,” matud pa ni Bachmann sa SMS message ngadto sa SPIN.ph.