Pacquiao, Porter posibleng makontra sa sunod away ni Crawford
CEBU, Philippines — Anaa ra nila ni Manny Pacquiao (67-7-2, 39KOs) ug Shawn Porter (31-3-1, 17KOs) ang posibleng makontra sa sunod nga away ni undefeated World Boxing Organization (WBO) welterweight champion Terence Crawford (37-0, 28KOs). Mao ni ang duha ka boksidor nga natatak sa alimpatakan ni Top Rank promoter Bob Arum. Sa sayo pa, ang 33-anyos nga si Crawford ang mipahibalo nga kursonada siyang makigbinukbukay sa 42-anyos nga si Pacquiao, ang bugtong eight-division world champion sa kasaysayan.
Apan si Pacquiao niyamar og $40 million nga ganti o dul-an sa dos bilyones pesos aron mahitabo ang away.
Kon dili makaya ang Pacquiao-Crawford showdown, si Crawford lagmit mokagat ni Porter, ang two-time welterweight champion.
Ang Filipino boxing legend nga si Pacquiao, wala na makaaway sukad nidaog pinaagi sa split decision batok sa kanhi wa'y pildeng si Keith Thurman aron pagsakmit sa WBA 'Super' welterweight belt niadtong Hulyo 2019. Apan ning bag-o lang, ang WBA milangkat sa iyang titulo gumikan kay pakyas siya pagdepensa niini bisan kausa.
- Latest