Pamilya, damgo nakadasig ni ex-UV star Manzo pagsalmot sa PBA draft

CEBU, Philippines — Si kanhi University of the Visayas (UV) Green Lancers star guard Jun Kent Manzo, apil sa bagang panon sa mga players nga moapil sa 2021 PBA Rookie Draft nga gikatakda karong Marso 14.

Ang 23-anyos nga si Manzo lumad gikan sa Nasipit, Agusan del Norte, apan unang misikat ug mihimo og pangan sa natad sa basketbol samtang nagduwa sa UV Lancers sa Cebu Schools Athletic Foundation, Inc. (CESAFI) gikan sa 2013 ngadto sa 2015. Mipakita siya og aksiyon sa Lancers sud sa tulo ka tuig sa wala pa miadto sa Manila aron motapon sa University of the Philippines (UP) Fighting Maroons sa UAAP.

Gibati og kaandam sa mas dako nga liga tungod sa halapad niyang kasinatian sa amateur ug commercial basketball, si Manzo nakakuhom nga mo-aplay sa PBA Draft duha ka bulan gikan karon.

Sama sa ubang mga nangindahay, adunay mga butang nga nakapadasig ni Manzo sa iyang tinguha nga makaduwa sa labing unang propesyonal nga liga sa Asya.

Una niini mao ang iyang pamilya nga maoy iyang pundasyon sa kusog ug tinubdan sa inspirasyon.

"Unang una, akong motivation kay akong family nga makatabang ko'g balik sa ilaha kay wala man ko karon kon dili pud tungod nila," matud pa ni Manzo. "Hinaut lang nga ihatag sa Ginoo sa akoa ang akong pangandoy na makadula sa PBA."