CEBU, Philippines — Gisalikway sa Japan ug sa International Olympic Committee (IOC) ang nikatap nga mga balita nga kanselado ang Tokyo Olympics. Bisan ang Japan gipaubos sa state of emergency tungod sa third wave sa Covid-19 infections, ang mga tigpasiugda sa Tokyo Olympic mipasalig nga madayon ang pagbukas sa dakong kalihukan sa paugnat sa kusog nga mahitabo kausa sa upat ka tuig karong Hulyo 23 human kini gisuspenso dul-an usa ka tuig tungod sa Covid-19 pandemic.
Ang Times, usa ka mantalaan sa Britanya, nikulto sa wala magpaila sa kagamhanang tinubdan, mitaho nga ang mga duwa kanselado.
"No one wants to be the first to say so but the consensus is that it's too difficult," ang tinubdan nagkanayon. "Personally, I don't think it's going to happen."
Sa pamahayag niadtong Biyernes, ang local organizing committee wala direkta nga mitumbok sa balita sa Times, apan nagkanayon ang Olympics paingon na sa padulngan niini ug suportado kini ni Primero Ministro Yoshihide Suga.
Nisugod ang pagkatap sa balita sa kanselasyon ning bulana dihang ang kagamhanan sa Japan mibutang sa Tokyo ubos sa state of emergency aron mapugngan ang pagsaka sa mga kaso sa coronavirus.