CEBU, Philippines — Suwayan sa Barangay Ginebra Kings pag-inat og balik sa ilang labaw, samtang ang TNT Tropang Giga laraw sab nga makatabla sa dihang mag-abot na sab sila sa Game-4 sa PBA Philippine Cup best-of-seven finals karong alas-6 sa gabii didto sa AUF Sports Arena sa Angeles City, Pampanga.
Human giharos og daog ang nag-unang duha ka duwa sa parehong sikit nga desisyon, si coach Tim Cone ug ang Kings wala mahibalo kon unsay miigo kanila human silang gilubong sa Tropang Giga, 88-67 sa Game-3 niadtong Biyernes.
Naglabaw pa hinuon ang Ginebra, 2-1.
Igo lamang nakalabaw ang Kings sa unang kuwarter, 26-21 gumikan kay wala na sila makaugpo human miabante ang TNT sa halftime, 44-34.
Misamot pa ang kainit sa Tropang Giga sa naghinapos nga bahin sa aksiyon diin ilang gipabuthan ang Kings og 22-11 nga bomba nga miresulta ngadto sa 21 puntos nga demolisyon.
Gilabhan sa TNT ang Ginebra bisan og wala ang tirador nilang si Bobby Ray Parks Jr. sa ikaduhang sagunson nga duwa gumikan sa injury.
Ang Sugboanong si RR Pogoy ug ingon man sila si Troy Rosario, Jayson Castro, Simon Enciso ug Poy Erram misalida sab og maayo diin sila nagkumboya'g 74 puntos aron palagsikon og balik ang kampanya sa Tropang Giga nga malangkat ang makasaysayanong korona sa PBA bubble.