Top players sa PBA bubble pasidunggan

CEBU, Philippines — Ang PBA mopasidungog sa mga players nga mipakita og maayong labok sa Philippine Cup didto sa Clark bubble.

Mao kini ang nadesisyonan sa mga opisyales sa liga atol sa ilang virtual board meeting nga gipangulohan nilang PBA chaiman Ricky Vargas ug commissioner Willie Marcial niadtong Huwebes.

Apan espesyal nga 'Best Player of the Conference' award ug dili season MVP ang ihatag ngadto sa labing maayong player sa Philippine Cup bubble.

Tungod sa pandemiya, ang PBA napugos pagpahigayon og usa lamang sa torneyo imbes sa naandan niining tulo ka komperensiya matag season.

Mao kini ang hinungdan nganong ang PBA dili makatunol og season MVP award gumikan kay ang All-Filipino Cup man lamang maoy ilang napahigayon ning tuiga.

Gawas sa BPC, pasidunggan sab ang Outstanding Rookie, Most Improved Player, Sportsmanship awardee ug Special Team sa PBA Special Awards karong Enero.

Sa laing bahin, si Marcial mibutyag nga ang sunod PBA season gikatakda nga mosikad sa Abril 9, 2021 dungan sa kasaulogan sa ika-46 nga anibersaryo sa liga. Miangkon hinuon si Marcial nga ang tanan mag-agad pa kon unsay dagan sa sitwasyon pag-abot nianang panahona.