CEBU, Philippines — Sugboanong skateboard sensation nga si Margielyn Didal nakadaog og silver medal sa Madrid Urban Sports online tournament.
Si Didal, gold medalist sa Asian Games ug Southeast Asian Games, misalmot sa kompetisyon gamit ang plataporma nga ilang gitukod sa ilang balay sa Barangay Lahug,Dakbayan sa Sugbo.
Ang World No. 14 nga si Didal mibuntog ni World No. 8 Gabriela Mazetto aron pag-abante sa final round.
Pakyas hinuon si Didal sa iyang misyon nga langkaton ang gold medal human siya gipilde ni Nanaka Fukisawa sa Japan sa ilang kampiyonato. Walay hunong si Didal sa iyang training sa tinguha nga makarepresentar sa Pilipinas sa Tokyo Olympics sunod tuig.