Tagakay sa PBA bubble
CEBU, Philippines — Gipaabot nga usa ka init ug kulbahinam nga pinaksitay ang masaksihan sa mga fans gumikan kay ang nahibiling upat ka teams magtiwas sa tagakay nga Game-5 sa PBA Philippine Cup semifinals karong adlawa didto sa AUF Sports Arena sa Angeles City, Pampanga.
Kay pareho mang tabla ang duha ka best-of-five series sa baraha nga 2-2, tataw nga buhaton sa mga koponan ang tanan kutob sa ilang mahimo gumikan kay luna sa finals man maoy ganti sa mga mananaog, samtang ang mangapilde mobakwit na sa PBA bubble.
Ang Barangay Ginebra Kings mohamag sa Meralco Bolts sa katapusang higayon sa alas-6:30 sa gabii, samtang ang Phoenix Super LPG Fuel Masters ug TNT Tropang Giga parehong nangandam nga tuldokan ang ilang panagribal sa dihang mag-abot sila sa first game sa alas3:45 sa hapon.
Human milayat ngadto sa 2-1 nga labaw, ang Kings ug Fuel Masters nanginahanglan na lang unta og usa ka daog aron moabante sa kampiyonato, apan nadiskaril ang ilang plano human sila mapilde sa ilang mga kaatbang sa Game-4 niadtong Miyerkules.
Nagsandig sa pagkamabayanihon nilang Reynel Hugnatan ug Chris Newsome ug sa krusyal nga block ni Raymond Almazan, ang Bolts mipakugang sa Kings, 83-80 aron inaton ang ilang serye ngadto sa tibuok niining lima ka duwa nga rota.
Sama sa Bolts, ang Tropang Giga nakaangkon sab og laing kinabuhi human nakaipsot batok sa Fuel Masters sa kulbahinam nga duwa, 102-101 luyo sa 36 puntos nga eksplosyon ni Bobby Ray Parks. Karon nga ang serye mikupos ngadto na lang sa tagakay nga duwa, matira ang matibay maoy seguradong eksena sa pagkarambola sa upat ka koponan.
- Latest
