Praktis sa PBA nadamay
CEBU, Philippines — Dili lamang ang mga duwa, apan hasta sab ang mga praktis sa tanang teams ang gihunong sa PBA sud sa ilang bubble didto sa Clark, Pampanga.
Sugod niadtong Biyernes, temporaryong gihunong sa PBA ang Season 45 Philippine Cup segun sa mando sa Technical Working Group of the IATF and the DoH Advisory Group of Experts.
Gibuhat kini aron pagseguro nga wala maguba ang integridad sa PBA bubble human ang usa ka reperi ug usa ka player ang nagpositibo sa Covid-19 sa miaging semana. Pareho na hinuon silang nagnegatibo sa conformatory tests.
Ipadayon lamang sa PBA ang naputol nilang aksiyon kon duna na'y bag-ong mga lagda ug patakaran alang sa kaluwasan ug panglawas nga iplasatada ang IATF ug DOH sud sa ilang bubble.
Walay ipahigayon nga mga duwa ug wala say praktis apan ang tanang teams gitugotan nga makagamit sa mga pasilidad sa Quest Hotel sama sa pool, gym ug ang jogging area.
Mao kini ang ikaduhang higayon nga gisuspenso sa PBA ang kasamtangan niining season, Ang una niadtong Marso human sa pag-ulbo sa pandemiya.
- Latest