Ginebra laraw makatabla sa TNT

CEBU, Philippines — Laraw sa Barangay Ginebra Kings  nga makaangkon og bahin sa liderato sa ilang pakigsangka batok sa Magnolia Hotshots sa PBA bubble play karong adlawa didto sa AUF Sports Arena sa Angeles City, Pampanga. Ang Ginebra  ug Magnolia mag-abot sa main game sa alas-6:45 sa gabii human duwa tali sa Rain or Shine Elasto Painters ug  Blackwater Elite nga sugdan sa alas-4 sa hapon.

Nadasig sa upat ka sagunson nilang daog nga maoy labing nindot nilang sinugdanan sukad niadtong 1986 Open Conference, ang Ginebra nagpanikad nga makatabla sa TNT Tropang Giga nga nagsolo karon sa liderato bitbit ang 5-0 record.

Inilog hinuon ang Ginebra batok sa Magnolia nga usa karon sa mga nangiwit nga teams kay kausa pa makadaog sud sa lima ka duwa.

Sa laing bahin, ang Elasto Painters nagpangagot nga makabawi sa miagi nilang kaparotan ug plano nilang pahimungtan sa ilang kayugot ang Elite.

Ang E-Painters ikatulo karon sa standings uban ang 3-1 win-loss record, samtang ang Elite nahimutang sa ikawalong puwesto bitbit ang 3-2 nga baraha.