PBA ref nagpositibo sa Covid-19 test, lagmit usa ka kaso sa "false positive"

CEBU, Philippines — Ang reperi sa nagpadayong 2020 PBA Philippine Cup didto sa Clark bubble nga gisuspetsahan nga dunay Covid-19 lagmit usa ka kaso sa "false positive" human ang antigen testing nga gipahigayon kaniya niadtong Miyerkules nag-negatibo sa presensiya sa gikahadlokang virus.

Ang maong reperi magpabilin sa estriktong 14 ka adlaw nga kwarantin didto sa Athletes' Village sa New Clark City ug gikatakdang ipaubos sa laing RT-PCR test aron ikompirma ang negatibong resulta sa iyang antigen test, segun sa PBA ug Clark Development Corp. (CDC) sa usa ka hiniusang pamahayag.

Kadtong walo ka tawo nga gilista nga close contacts sa reperi na-establisar na sab ug gipang-isolate sud sa 12 ka oras. Gitakda sila nga ipaubos sa laing hugna sa RT-PCR tests ugmang adlawa, Oktubre 24.

Isip kabahin sa estrikto nilang patakaran sa panglawas ug kaluwasan, ang PBA mikuha dayon sa reperi sa iyang kuwarto  human nagpositibo kini sa RT-PCR test.

Sa wala pa pasudla ug sa dihang diha na siya sud sa PBA bubble, ang maong reperi gipaubos sa RT-PCR tulo ka higayon ug nag-negatibo tanan ang resulta. Nagpabilin siya nga walay gipakitang sintomas.

Tungod sa nahitabo, gilimitahan sa PBA ang mga lihok sa tanang mga hintungdan sud sa bubble.